எசாயா அதிகாரம் – 18 – திருவிவிலியம்

1எத்தியோப்பியாவின் ஆறுகளுக்கு

அப்பால் சிறகடித்து ஒலியெழுப்பும்

உயிரினங்கள் உடையதோர்

நாடு உள்ளது.

2அது நாணல் படகுகளில் நீரின்மேலே

கடல் வழியாகத் தூதரை அனுப்புகிறது;

விரைவாய்ச் செல்லும் தூதர்களே,

உயர்ந்து வளர்ந்து,

பளபளப்பான தோலுடைய

இனத்தாரிடம் செல்லுங்கள்;

அருகிலும் தொலைவிலும் உள்ளோரை

அச்சுறுத்திய

மக்கள் கூட்டத்தார் அவர்கள்;

ஆற்றல் வாய்ந்தவர்கள்,

பகைவரை மிதித்து

வெற்றிகொள்பவர்கள் அந்த நாட்டினர்;

ஆறுகள் குறுக்காகப்

பாய்ந்தோடும் நாடும் அது.

3உலகில் குடியிருக்கும் அனைத்து மக்களே,

மண்ணுலகில் வாழ்வோரே,

மலைகளின்மேல் கொடியேற்றும்போது

உற்று நோக்குங்கள்;

எக்காளம் ஊதும்போது

செவிகொடுங்கள்;

4ஏனெனில், ஆண்டவர் என்னிடம்

இவ்வாறு சொன்னார்:

‟பகலில் அடிக்கும்

வெப்பம் குறைந்த வெயில்போலும்,

அறுவடைக்கால வெயிலால்

உண்டாகும் பனிமேகம் போன்றும்

என் இருப்பிடத்தில் அமைதியாய் இருந்து

நான் கவனித்துப் பார்ப்பேன்”

5ஏனெனில், அறுவடைக்கு முன்

பூக்கள் பூத்துக் காய்த்து,

கனிதரும் பருவம் எய்தும்போது,

தழைகளை எதிரி

அரிவாள்களால் அறுத்தெறிவான்;

படரும் கொடிகளை
அரிந்து அகற்றிவிடுவான்.

6அவை அனைத்தும், மலைகளில்

பிணந்தின்னும் பறவைகளுக்கும்

தரையில் வாழுகின்ற

விலங்குகளுக்கும் விடப்படும்.

பிணந்தின்னும் பறவைகள்

கோடைக் காலத்திலும்

தரை வாழும் விலங்குகள்

குளிர்காலத்திலும்
அவற்றின் மேல் தங்கியிருக்கும்.